nahin sharik azabon ka jaan-e-jaan koi

nahīñ sharīk azāboñ kā jān-e-jāñ koī

ḳhudā gavāh nahīñ hai nahīñ yahāñ koī

vo dekho baañh pasāre hai sāmne manzil

faqat gumāñ hai ki hai raah darmiyāñ koī

chubhan sī kaise piro dī hai us ne sāñsoñ meñ

shikāyatoñ meñ numāyāñ hai mehrbāñ koī

ināyateñ haiñ tirī dhuup sard mausam kī

baḌhe jo had se to baiThe bhalā kahāñ koī

rahā vo gosh-bar-āvāz aur hameñ barsoñ

ḳhayāl tak nahīñ aa yā ki hai yahāñ koī

sivā.e halqa-e-yārāñ meñ apnī shohrat ke

hamārī zaat kā dushman yahāñ kahāñ koī

har ek samt ḳhamoshī kā kufr chhāyā hai

hamārī zaat ke sahrā meñ de azaañ koī

nahin sharik azabon ka jaan-e-jaan koi

KHuda gawah nahin hai nahin yahan koi

wo dekho banh pasare hai samne manzil

faqat guman hai ki hai rah darmiyan koi

chubhan si kaise piro di hai us ne sanson mein

shikayaton mein numayan hai mehrban koi

inayaten hain teri dhup sard mausam ki

baDhe jo had se to baiThe bhala kahan koi

raha wo gosh-bar-awaz aur hamein barson

KHayal tak nahin aa ya ki hai yahan koi

siwae halqa-e-yaran mein apni shohrat ke

hamari zat ka dushman yahan kahan koi

har ek samt KHamoshi ka kufr chhaya hai

hamari zat ke sahra mein de azan koi