nai mohabbat se hamein hai na murawwat se gurez

nai mohabbat se hameñ hai na muravvat se gurez

'umr bhar ham ne kiyā sirf 'adāvat se gurez

sirf takmīl-e-havas 'ishq kā maqsūd nahīñ

ye mohabbat hai to phir aisī mohabbat se gurez

tere lahje meñ ḳhudā bol rahā thā be-shak

kaun kartā tire lafzoñ kī sadāqat se gurez

dostoñ ke liye ashkoñ ko kahāñ tak piite

ho ke majbūr kiyā ham ne sharāfat se gurez

us jafā-kār ke ġham meñ ye barastīñ kab tak

chashm-e-giryāñ ne kiyā ab to basārat se gurez

ye alag baat ki ik fāsla rakkhā ham ne

ham na kar paa.e magar us kī rifāqat se gurez

ye zarūrī hai ki jiddat meñ koī fikr bhī ho

zehn-e-tābinda kareñ ḳhuub rivāyat se gurez

koī ehsān na thā apnī ḳhudī ko manzūr

'umr bhar ham ne kiyā us kī 'ināyat se gurez

us gul-e-rā'nā ko īmāñ pe na dūñgā tarjīh

kyoñ karūñ us ke liye 'shams' 'ibādat se gurez

nai mohabbat se hamein hai na murawwat se gurez

'umr bhar hum ne kiya sirf 'adawat se gurez

sirf takmil-e-hawas 'ishq ka maqsud nahin

ye mohabbat hai to phir aisi mohabbat se gurez

tere lahje mein KHuda bol raha tha be-shak

kaun karta tere lafzon ki sadaqat se gurez

doston ke liye ashkon ko kahan tak pite

ho ke majbur kiya hum ne sharafat se gurez

us jafa-kar ke gham mein ye barastin kab tak

chashm-e-giryan ne kiya ab to basarat se gurez

ye alag baat ki ek fasla rakkha hum ne

hum na kar pae magar us ki rifaqat se gurez

ye zaruri hai ki jiddat mein koi fikr bhi ho

zehn-e-tabinda karen KHub riwayat se gurez

koi ehsan na tha apni KHudi ko manzur

'umr bhar hum ne kiya us ki 'inayat se gurez

us gul-e-ra'na ko iman pe na dunga tarjih

kyon karun us ke liye 'shams' 'ibaadat se gurez