nai ada nae andaz mein sadi guzre

na.ī adā na.e andāz meñ sadī guzre

ḳhizāñ kī rut meñ bhī sā'at bahār sī guzre

bachā thā tanhā lahū dil kā pī liyā maiñ ne

majāl kyā mire hoñToñ se tishnagī guzre

koī sulagtī añgīThī bhī mere haath pe rakh

mire ḳhudā mirī āñkhoñ se jab namī guzre

ye sarfarāzī-e-nuqta to pā hī lenā hai

hazār raah meñ dīvār-e-āhanī guzre

jo zaḳhm-e-dil haiñ vo nāgāh phuul ban jaa.eñ

kuchh is adā se bhī bād-e-sabā kabhī guzre

chalo unhīñ ko badal leñge dushmanī meñ ham

vo 'ahd jo kabhī az-rāh-e-dostī guzre

mirī tabāhī-e-dil kā sabab yahī hai 'shamīm'

ki mere dil se jo guzre vo sāzishī guzre

nai ada nae andaz mein sadi guzre

KHizan ki rut mein bhi sa'at bahaar si guzre

bacha tha tanha lahu dil ka pi liya main ne

majal kya mere honTon se tishnagi guzre

koi sulagti angiThi bhi mere hath pe rakh

mere KHuda meri aankhon se jab nami guzre

ye sarfaraazi-e-nuqta to pa hi lena hai

hazar rah mein diwar-e-ahani guzre

jo zaKHm-e-dil hain wo nagah phul ban jaen

kuchh is ada se bhi baad-e-saba kabhi guzre

chalo unhin ko badal lenge dushmani mein hum

wo 'ahd jo kabhi az-rah-e-dosti guzre

meri tabahi-e-dil ka sabab yahi hai 'shamim'

ki mere dil se jo guzre wo sazishi guzre