نئی ادا نئے انداز میں صدی گزرے

نئی ادا نئے انداز میں صدی گزرے

خزاں کی رت میں بھی ساعت بہار سی گزرے

بچا تھا تنہا لہو دل کا پی لیا میں نے

مجال کیا مرے ہونٹوں سے تشنگی گزرے

کوئی سلگتی انگیٹھی بھی میرے ہاتھ پہ رکھ

مرے خدا مری آنکھوں سے جب نمی گزرے

یہ سرفرازیٔ نقطہ تو پا ہی لینا ہے

ہزار راہ میں دیوار آہنی گزرے

جو زخم دل ہیں وہ ناگاہ پھول بن جائیں

کچھ اس ادا سے بھی باد صبا کبھی گزرے

چلو انہیں کو بدل لیں گے دشمنی میں ہم

وہ عہد جو کبھی از راہ دوستی گزرے

مری تباہیٔ دل کا سبب یہی ہے شمیمؔ

کہ میرے دل سے جو گزرے وہ سازشی گزرے