namkin hai kahin to kahin be-namak nami

namkīn hai kahīñ to kahīñ be-namak namī

utrī huī hai mujh meñ baḌī duur tak namī

hotā hai hijr pāñch 'anāsir pe mushtamil

ummīd intizār udāsī kasak namī

phir sochā ‘an-qarīb tahī-chashm ho na jā.ūñ

pahle to maiñ luTātā rahā be-dhaḌak namī

mujh meñ chhupe hunar ko kiyā ġham ne yuuñ 'ayāñ

miTTī pe gir ke jaise uḌā de mahak namī

sākin haiñ chup haiñ zard haiñ maiñ aur ye pahāḌ

ham meñ bas ek chiiz nahīñ mushtarak namī

taḳhlīq ke liye ye fazā sāzgār hai

halkī phuhār ḳhāmushī ḳhālī saḌak namī

girye ne yuuñ bhare haiñ hamārī jalan meñ rang

jaise kiran ko chhū ke banā de dhanak namī

namkin hai kahin to kahin be-namak nami

utri hui hai mujh mein baDi dur tak nami

hota hai hijr panch 'anasir pe mushtamil

ummid intizar udasi kasak nami

phir socha ‘an-qarib tahi-chashm ho na jaun

pahle to main luTata raha be-dhaDak nami

mujh mein chhupe hunar ko kiya gham ne yun 'ayan

miTTi pe gir ke jaise uDa de mahak nami

sakin hain chup hain zard hain main aur ye pahaD

hum mein bas ek chiz nahin mushtarak nami

taKHliq ke liye ye faza sazgar hai

halki phuhaar KHamushi KHali saDak nami

girye ne yun bhare hain hamari jalan mein rang

jaise kiran ko chhu ke bana de dhanak nami