naqab chehre pe baaten luab-dar kare

naqāb chehre pe bāteñ luāb-dār kare

vo rahnumā hai siyāsat kā kārobār kare

ye sirf ḳhvāboñ kitāboñ kī baat lagtī hai

ki ik ġharīb kī imdād māl-dār kare

na.e zamāne kā rahzan nayā salīqa hai

vo lauTtā hai magar pahle hoshiyār kare

charāġh le ke bhī DhūñDheñge to milegī nahīñ

jahāñ meñ ek bhī hastī jo maañ sā pyaar kare

havā ke zor se hī kashtiyāñ nahīñ chaltīñ

ki nāḳhudā bhī ḳhudā se zarā guhār kare

vo gul-badan hai mukammal bahār se baḌh kar

bas us kā zikr hī mausam ko ḳhush-gavār kare

na jaane kaun sī bastī kā tū hai bāshinda

tujhe 'dinesh' koī ġham na be-qarār kare

naqab chehre pe baaten luab-dar kare

wo rahnuma hai siyasat ka karobar kare

ye sirf KHwabon kitabon ki baat lagti hai

ki ek gharib ki imdad mal-dar kare

nae zamane ka rahzan naya saliqa hai

wo lauTta hai magar pahle hoshiyar kare

charagh le ke bhi DhunDhenge to milegi nahin

jahan mein ek bhi hasti jo man sa pyar kare

hawa ke zor se hi kashtiyan nahin chaltin

ki naKHuda bhi KHuda se zara guhaar kare

wo gul-badan hai mukammal bahaar se baDh kar

bas us ka zikr hi mausam ko KHush-gawar kare

na jaane kaun si basti ka tu hai bashinda

tujhe 'dinesh' koi gham na be-qarar kare