naqsh-e-pa jab DhunDhti hun mein tumhaara ret par

naqsh-e-pā jab DhūñDhtī huuñ meñ tumhārā ret par

yaad kī kuchh sīpiyāñ haiñ ab sahārā ret par

jaañ hamārī bach ga.ī hai mausamoñ ke ḳhauf se

jaatī rut ke ham musāfir ghar hamārā ret par

sāhil-e-armāñ se uTThī jab bhī mauj-e-be-amāñ

baiTh kar maiñ dekhtī huuñ ye nazāra ret par

tū ulajh ke rah gayā hai bandhanoñ ke jaal meñ

āñsuoñ ke taar TuuTe hai ishāra ret par

hasrat-e-tāmīr kī ab dil meñ ḳhvāhish hī nahīñ

kis qadar vīrāñ khañDar hai ghar hamārā ret par

titliyoñ ko rok lo jaane na do bād-e-sabā

ab 'bahār'-e-be-ḳhizāñ kā hai guzārā ret par

naqsh-e-pa jab DhunDhti hun mein tumhaara ret par

yaad ki kuchh sipiyan hain ab sahaara ret par

jaan hamari bach gai hai mausamon ke KHauf se

jati rut ke hum musafir ghar hamara ret par

sahil-e-arman se uTThi jab bhi mauj-e-be-aman

baiTh kar main dekhti hun ye nazara ret par

tu ulajh ke rah gaya hai bandhanon ke jal mein

aansuon ke tar TuTe hai ishaara ret par

hasrat-e-tamir ki ab dil mein KHwahish hi nahin

kis qadar viran khanDar hai ghar hamara ret par

titliyon ko rok lo jaane na do baad-e-saba

ab 'bahaar'-e-be-KHizan ka hai guzara ret par