nasKH-o-nisyan ban ke phail gai

nasḳh-o-nisyān ban ke phail ga.ī

ḳhaak insān ban ke phail ga.ī

hasrat-e-shauq-e-dīd manzil par

chashm-e-hairān ban ke phail ga.ī

merī ḳhāmoshī bazm-e-yārāñ meñ

ek e'lān ban ke phail ga.ī

ḳhvāhishoñ kī kasak na jaane kab

mujh meñ sartān ban ke phail ga.ī

ek zanjīr chand harfoñ kī

jaise zindān ban ke phail ga.ī

had se guzrī to tang-dastī mirī

sāz-o-sāmān ban ke phail ga.ī

shahr-e-hastī meñ ḳhū-e-gumnāmī

merī pahchān ban ke phail ga.ī

har talab un ke āstāñ pe 'amar'

husn-e-imkān ban ke phail ga.ī

nasKH-o-nisyan ban ke phail gai

KHak insan ban ke phail gai

hasrat-e-shauq-e-did manzil par

chashm-e-hairan ban ke phail gai

meri KHamoshi bazm-e-yaran mein

ek e'lan ban ke phail gai

KHwahishon ki kasak na jaane kab

mujh mein sartan ban ke phail gai

ek zanjir chand harfon ki

jaise zindan ban ke phail gai

had se guzri to tang-dasti meri

saz-o-saman ban ke phail gai

shahr-e-hasti mein KHu-e-gumnami

meri pahchan ban ke phail gai

har talab un ke aastan pe 'amar'

husn-e-imkan ban ke phail gai