نسل نو کے لیے منزل کا نوشتہ رکھ دے

نسل نو کے لیے منزل کا نوشتہ رکھ دے

راہ میں کوئی مرا نقش کف پا رکھ دے

رت بدل جائے گی پت جھڑ کی مگر شرط یہ ہے

شاخ پر لا کے کوئی پھول سا چہرہ رکھ دے

ہے مری پیاس کی شدت پہ اگر شک تجھ کو

لا مرے سامنے بہتا ہوا دریا رکھ دے

اے جواں مرد مجاہد نئے حالات سمجھ

اب قلم تھام لے اور ہاتھ سے نیزہ رکھ دے

گھر میں فاقوں کے سوا کچھ بھی نہیں ہے سائل

تو ہی کہہ دے ترے کاسے میں کوئی کیا رکھ دے

اے خدا مجھ کو حقیقت کے عذابوں سے نکال

میری آنکھوں میں کوئی خواب سہانا رکھ دے

کچھ بھی ہو وہ ترا غم خوار نہیں ہے رزمیؔ

بیلچہ چھین کے جو ہاتھ میں کاسہ رکھ دے