نومید کرم ہو کر مایوس دعا ہو کر

نومید کرم ہو کر مایوس دعا ہو کر

ہم بیٹھ گئے آخر راضی بہ رضا ہو کر

ان بند گپھاؤں سے کیوں ہم کو لگاؤ ہے

جن بند گپھاؤں سے آئے ہیں رہا ہو کر

چھوتے ہی مرا چہرہ نم کر گئی آنکھوں کو

یادوں کے سمندر سے آئی تھی ہوا ہو کر

کیوں ٹوٹتے رشتوں پر اشک آ گئے آنکھوں میں

ہونے دو اگر کوئی جاتا ہے خفا ہو کر

تو نے مجھے ایسے بھی دن رات دکھائے ہیں

رہ جاتی ہے جب دنیا بس ایک خلا ہو کر

اچھے رہے جو پل پل موسم کی طرح بدلے

کیا پا لیا ہم نے بھی پابند وفا ہو کر

دشمن پہ شبابؔ اپنے کیوں مجھ کو نہ رحم آئے

گالی مجھے دشمن کی لگتی ہے دعا ہو کر