naza ki hichki mariz-e-hijr ki dam-saz hai

naza.a kī hichkī marīz-e-hijr kī dam-sāz hai

sunñe vaale ġhaur se sun āḳhirī āvāz hai

laakh ai zāhid nishāt-e-jāñ iram kā raaz hai

jalva-gāh-e-nāz phir bhī jalva-gāh-e-nāz hai

kaun jān-e-ārzū mahv-e-ḳhirām-e-nāz hai

zarra zarra mere dil kā farsh-e-pā-andāz hai

muḳhtalif naġhme haiñ lekin ek hī āvāz hai

hastī-e-dil ek nairang-e-tilism-e-sāz hai

be-niyāz-e-jazb-e-ulfat intiqām-e-ishq dekh

dil thā pahle bazm meñ ab dil hī bazm-e-nāz hai

dekh kar pāmāl karnā merī turbat kī zamīñ

qabr hai zālim magar qabr-e-shahīd-e-nāz hai

jin ko armāñ hogā un ko hogā armāñ diid kā

zarra zarra apne dil kā jalva-gāh-e-nāz hai

zindagī us kī hai maut us kī hai turbat us kī hai

jis kī ḳhāk-e-dil pe vo mahv-e-ḳhirām-e-nāz hai

ab kahāñ vo naġhma-e-dil kī sadā-e-jāñ-navāz

bolne vaalā jo parda thā vahī be-sāz hai

fikr-e-āzādī ko ai sayyād āzādī samajh

ye taḌapnā dil kā bhī minjumla-e-parvāz hai

ai mire TuuTe hue dil kī sadā-e-muntashir

dekh jo hai jis jagah par gosh-bar-āvāz hai

is se pahle dil liyā thā tum ne jis andāz se

aaj bhī kyā baat karne kā vahī andāz hai

umr guzrī maut aa.ī ban ke anjām-e-hayāt

aur abhī tak ishq kā āġhāz hī āġhāz hai

jaan barbād-e-tamannā dil ḳharāb-e-ārzū

har-nafas rāh-e-talab meñ naġhma-e-be-sāz hai

āshiyāñ vaale ḳhudārā kar na zikr-e-āshiyāñ

pattā pattā gulsitāñ kā gosh-bar-āvāz hai

naġhma-e-roz-eazal tere tarannum ke nisār

sunñe vaalā aaj bhī mahv-e-sadā-e-sāz hai

dard ko rakhte haiñ siine meñ chhupā.e har ghaḌī

kyā kaheñ 'afqar' kisī se dil kā apne raaz hai

naza ki hichki mariz-e-hijr ki dam-saz hai

sunne wale ghaur se sun aaKHiri aawaz hai

lakh ai zahid nishat-e-jaan iram ka raaz hai

jalwa-gah-e-naz phir bhi jalwa-gah-e-naz hai

kaun jaan-e-arzu mahw-e-KHiram-e-naz hai

zarra zarra mere dil ka farsh-e-pa-andaz hai

muKHtalif naghme hain lekin ek hi aawaz hai

hasti-e-dil ek nairang-e-tilism-e-saz hai

be-niyaz-e-jazb-e-ulfat intiqam-e-ishq dekh

dil tha pahle bazm mein ab dil hi bazm-e-naz hai

dekh kar pamal karna meri turbat ki zamin

qabr hai zalim magar qabr-e-shahid-e-naz hai

jin ko arman hoga un ko hoga arman did ka

zarra zarra apne dil ka jalwa-gah-e-naz hai

zindagi us ki hai maut us ki hai turbat us ki hai

jis ki KHak-e-dil pe wo mahw-e-KHiram-e-naz hai

ab kahan wo naghma-e-dil ki sada-e-jaan-nawaz

bolne wala jo parda tha wahi be-saz hai

fikr-e-azadi ko ai sayyaad aazadi samajh

ye taDapna dil ka bhi minjumla-e-parwaz hai

ai mere TuTe hue dil ki sada-e-muntashir

dekh jo hai jis jagah par gosh-bar-awaz hai

is se pahle dil liya tha tum ne jis andaz se

aaj bhi kya baat karne ka wahi andaz hai

umr guzri maut aai ban ke anjam-e-hayat

aur abhi tak ishq ka aaghaz hi aaghaz hai

jaan barbaad-e-tamanna dil KHarab-e-arzu

har-nafas rah-e-talab mein naghma-e-be-saz hai

aashiyan wale KHudara kar na zikr-e-ashiyan

patta patta gulsitan ka gosh-bar-awaz hai

naghma-e-roz-eazal tere tarannum ke nisar

sunne wala aaj bhi mahw-e-sada-e-saz hai

dard ko rakhte hain sine mein chhupae har ghaDi

kya kahen 'afqar' kisi se dil ka apne raaz hai