nazar hathiyar karna chahte hain

nazar hathiyār karnā chāhte haiñ

adā se vaar karnā chāhte haiñ

nigāheñ chaar karnā chāhte haiñ

tumheñ ham pyaar karnā chāhte haiñ

rahe haiñ sabr kī bastī meñ zinda

to ab iz.hār karnā chāhte haiñ

nigāheñ band kar lī haiñ ki jānāñ

tirā dīdār karnā chāhte haiñ

banā kar hausla patvār ab ham

samundar paar karnā chāhte haiñ

adākārī daġhā dene kī kar ke

tujhe hoshyār karnā chāhte haiñ

sunā kar dāstāñ tark-e-ta.alluq

zamīñ hamvār karnā chāhte haiñ

ridā-e-be-hisī oḌhe haiñ yaañ jo

unheñ bedār karnā chāhte haiñ

hileñge lafzoñ se aivān saare

qalam talvār karnā chāhte haiñ

giraftār-e-mohabbat kar ke 'aiman'

ġhazab sarkār karnā chāhte haiñ

nazar hathiyar karna chahte hain

ada se war karna chahte hain

nigahen chaar karna chahte hain

tumhein hum pyar karna chahte hain

rahe hain sabr ki basti mein zinda

to ab izhaar karna chahte hain

nigahen band kar li hain ki jaanan

tera didar karna chahte hain

bana kar hausla patwar ab hum

samundar par karna chahte hain

adakari dagha dene ki kar ke

tujhe hoshyar karna chahte hain

suna kar dastan tark-e-talluq

zamin hamwar karna chahte hain

rida-e-be-hisi oDhe hain yan jo

unhen bedar karna chahte hain

hilenge lafzon se aiwan sare

qalam talwar karna chahte hain

giraftar-e-mohabbat kar ke 'aiman'

ghazab sarkar karna chahte hain