nazar milte hi kya kahiye main kya kya dekh leta hun

nazar milte hī kyā kahiye maiñ kyā kyā dekh letā huuñ

tirī āñkhoñ meñ tere dil kā naqsha dekh letā huuñ

chale jaanā abhī jaldī tumheñ kyā paḌ ga.ī aisī

zarā din dekh letā huuñ mahīna dekh letā huuñ

doī aisī miTī āḳhir ki ab ā.īne ke badle

tujhī ko ai but-e-ā.īna-sīmā dekh letā huuñ

bas itnī baat par mujh se ḳhafā haiñ ḳhānqah vaale

ki maiñ ik do ghaḌī chal phir ke duniyā dekh letā huuñ

abhī sāġhar na de mujh ko zarā mohtāt huuñ saaqī

tire piine pilāne kā tarīqa dekh letā huuñ

tumhārā huuñ magar tum se nahīñ huuñ ai chaman vaalo

koī dam aa ke phūloñ kā tamāshā dekh letā huuñ

vahī mastī bharī āñkheñ vahī shoḳhī bharī chitvan

unheñ maiñ yaad kyā kartā huuñ goyā dekh letā huuñ

baḌī jur.at se go arz-e-tamannā kar rahā huuñ maiñ

magar rah rah ke phir bhī un kā chehrā dekh letā huuñ

tujhe kis tarah chhoḌūñ kyā karūñ apnī nazar ko maiñ

taġhāful meñ tire rang-e-taqāzā dekh letā huuñ

bahut ai maut karne kā nahīñ maiñ intizār un kā

yahī do-chār din meñ aur rasta dekh letā huuñ

kabhī ab bhī milā un se to ai 'mohsin' tasavvur meñ

vo aglī sohbateñ aglā zamāna dekh letā huuñ

nazar milte hi kya kahiye main kya kya dekh leta hun

teri aankhon mein tere dil ka naqsha dekh leta hun

chale jaana abhi jaldi tumhein kya paD gai aisi

zara din dekh leta hun mahina dekh leta hun

doi aisi miTi aaKHir ki ab aaine ke badle

tujhi ko ai but-e-aina-sima dekh leta hun

bas itni baat par mujh se KHafa hain KHanqah wale

ki main ek do ghaDi chal phir ke duniya dekh leta hun

abhi saghar na de mujh ko zara mohtat hun saqi

tere pine pilane ka tariqa dekh leta hun

tumhaara hun magar tum se nahin hun ai chaman walo

koi dam aa ke phulon ka tamasha dekh leta hun

wahi masti bhari aankhen wahi shoKHi bhari chitwan

unhen main yaad kya karta hun goya dekh leta hun

baDi jurat se go arz-e-tamanna kar raha hun main

magar rah rah ke phir bhi un ka chehra dekh leta hun

tujhe kis tarah chhoDun kya karun apni nazar ko main

taghaful mein tere rang-e-taqaza dekh leta hun

bahut ai maut karne ka nahin main intizar un ka

yahi do-chaar din mein aur rasta dekh leta hun

kabhi ab bhi mila un se to ai 'mohsin' tasawwur mein

wo agli sohbaten agla zamana dekh leta hun