nazar se jis ki ab mastur hun main

nazar se jis kī ab mastūr huuñ maiñ

usī kī yaad se ma.amūr huuñ maiñ

chaTānoñ kī tarah madd-e-muqābil

magar andar se chaknā-chūr huuñ maiñ

shab-e-zulmat nahīñ havvā kī beTī

ujālā huuñ sahar kā nuur huuñ maiñ

mohabbat kā taqāza hai muravvat

samajhnā ye nahīñ majbūr huuñ maiñ

vafā kā pyaar kā paikar huuñ lekin

jo ho sayyād to zambūr huuñ maiñ

havā le kar uḌī hai zard patte

chaman meñ nargis-e-ranjūr huuñ maiñ

nishāñ us kī jabīñ kā kah rahā hai

tajallī se jalā huuñ tuur huuñ maiñ

'anā' TuuTī faqat rusvā.iyoñ se

ḳhushāmad se to kosoñ duur huuñ maiñ

nazar se jis ki ab mastur hun main

usi ki yaad se mamur hun main

chaTanon ki tarah madd-e-muqabil

magar andar se chakna-chur hun main

shab-e-zulmat nahin hawwa ki beTi

ujala hun sahar ka nur hun main

mohabbat ka taqaza hai murawwat

samajhna ye nahin majbur hun main

wafa ka pyar ka paikar hun lekin

jo ho sayyaad to zambur hun main

hawa le kar uDi hai zard patte

chaman mein nargis-e-ranjur hun main

nishan us ki jabin ka kah raha hai

tajalli se jala hun tur hun main

'ana' TuTi faqat ruswaiyon se

KHushamad se to koson dur hun main