nazar se KHas thi jo sholagi wo aam hui

nazar se ḳhaas thī jo sho'lagī vo 'aam huī

kahāñ kī āb-o-havā kis safar ke naam huī

maiñ jaise ruk sā gayā phir kināra-e-jāñ par

vo lahr jab mirī āñkhoñ se ham-kalām huī

ye ḳhvāb jaise kisī sā'at-e-digar ke haiñ ḳhvāb

ye shaam apne qarīne meñ aisī shaam huī

maiñ dil kī oT se sab sun rahā thā aur chup thā

navāh-e-jāñ meñ ye kaisī nidā tamām huī

ye raushnī ki jise likh rahā huuñ naġhma-e-nūr

mujhī meñ nazm huī nazm bhī mudām huī

ġhurūb-e-mehr ne ḳhvāboñ ko raah dī āḳhir

dayār-e-dil meñ bahut din ke baa'd shaam huī

nazar se KHas thi jo sho'lagi wo 'am hui

kahan ki aab-o-hawa kis safar ke nam hui

main jaise ruk sa gaya phir kinara-e-jaan par

wo lahr jab meri aankhon se ham-kalam hui

ye KHwab jaise kisi sa'at-e-digar ke hain KHwab

ye sham apne qarine mein aisi sham hui

main dil ki oT se sab sun raha tha aur chup tha

nawah-e-jaan mein ye kaisi nida tamam hui

ye raushni ki jise likh raha hun naghma-e-nur

mujhi mein nazm hui nazm bhi mudam hui

ghurub-e-mehr ne KHwabon ko rah di aaKHir

dayar-e-dil mein bahut din ke ba'd sham hui