nazar us chashm pe hai jam liye baiTha hun

nazar us chashm pe hai jaam liye baiThā huuñ

hai na piine kā ye matlab ki piye baiThā huuñ

raḳhna-andāzi-e-andoh se ġhāfil nahīñ maiñ

hai jigar chaak to kyā hoñT siye baiThā huuñ

kyā karūñ dil ko jo lene nahīñ detā hai qarār

jo muqaddar ne diyā hai vo liye baiThā huuñ

iltifāt ai nigah-e-hosh-rubā ab kyuuñ hai

paas jo kuchh thā vo pahle se diye baiThā huuñ

dil-e-pur-kaif salāmat ki akele meñ bhī

ek botal se baġhal garm kiye baiThā huuñ

'ārzū' jalte hue dil ke sharāre haiñ ye ashk

aag paanī ke kaToroñ meñ liye baiThā huuñ

nazar us chashm pe hai jam liye baiTha hun

hai na pine ka ye matlab ki piye baiTha hun

raKHna-andazi-e-andoh se ghafil nahin main

hai jigar chaak to kya honT siye baiTha hun

kya karun dil ko jo lene nahin deta hai qarar

jo muqaddar ne diya hai wo liye baiTha hun

iltifat ai nigah-e-hosh-ruba ab kyun hai

pas jo kuchh tha wo pahle se diye baiTha hun

dil-e-pur-kaif salamat ki akele mein bhi

ek botal se baghal garm kiye baiTha hun

'arzu' jalte hue dil ke sharare hain ye ashk

aag pani ke kaToron mein liye baiTha hun