نظریں بھی ان سے ملتی ہیں آپس میں اشارے ہوتے ہیں

نظریں بھی ان سے ملتی ہیں آپس میں اشارے ہوتے ہیں

کل تک جو کسی کے ہو نا سکے وہ آج ہمارے ہوتے ہیں

اللہ رے فریب ذوق نظر ایسے بھی نظارے ہوتے ہیں

جھڑتے ہیں شراروں سے گل بھی گل میں بھی شرارے ہوتے ہیں

ان ہلکی ہلکی موجوں میں ڈوبا ہے سفینہ کیا کہئے

تقدیر کی باتیں ہیں ورنہ تنکے بھی سہارے ہوتے ہیں

امید سہارے کی ان سے اے ڈوبنے والے توبہ کر

یہ صرف تماشائی سارے دریا کے کنارے ہوتے ہیں

بیمار شب فرقت کی ہنسی آخر یہ اڑائیں گے کب تک

ہونے دے تبسم ریز اگر یہ چاند ستارے ہوتے ہیں

یہ لالہ و گل یہ شمس و قمر یہ نقش مصورؔ یہ منظر

اک شعلۂ طور سینا کے یہ سارے شرارے ہوتے ہیں