nazzara-e-paiham ka sila mere liye hai

nazzāra-e-paiham kā silā mere liye hai

har samt vo ruḳh jalva-numā mere liye hai

us chehra-e-anvar kī ziyā mere liye hai

vo zulf-e-siyah tāb-e-dotā mere liye hai

zinhār agar ahl-e-havas tujh pe fidā huuñ

ye martaba-e-sadq-o-safā mere liye hai

ban kar maiñ razākār muhayyā-e-fanā huuñ

āvāza-e-haq bāñg-e-darā mere liye hai

ḳhush-nūdi-e-fujjār ke pairav haiñ yazīdī

taqlīd-e-shah-e-karb-o-balā mere liye hai

mahrūm huuñ majbūr huuñ be-tāb-o-tavāñ huuñ

maḳhsūs tire ġham kā mazā mere liye hai

sarmāya-e-rāhat hai fanā kī mujhe talḳhī

is zahr meñ sāmān-e-baqā mere liye hai

jannat kī havas ho to maiñ kāfir ki pareshāñ

us shoḳh kī ḳhushbu-e-qabā mere liye hai

pahle bhī kuchh ummīd na thī chāragaroñ ko

aur ab to davā hai na duā mere liye hai

mar jā.ūñgā mai-ḳhāne se niklā jo kabhī maiñ

nazzāra-e-mai rūh-fazā mere liye hai

tashḳhīs-e-tabībāñ pe hañsī aatī hai 'hasrat'

ye dard-e-jigar hai ki davā mere liye hai

nazzara-e-paiham ka sila mere liye hai

har samt wo ruKH jalwa-numa mere liye hai

us chehra-e-anwar ki ziya mere liye hai

wo zulf-e-siyah tab-e-dota mere liye hai

zinhaar agar ahl-e-hawas tujh pe fida hun

ye martaba-e-sadq-o-safa mere liye hai

ban kar main razakar muhayya-e-fana hun

aawaza-e-haq bang-e-dara mere liye hai

KHush-nudi-e-fujjar ke pairaw hain yazidi

taqlid-e-shah-e-karb-o-bala mere liye hai

mahrum hun majbur hun be-tab-o-tawan hun

maKHsus tere gham ka maza mere liye hai

sarmaya-e-rahat hai fana ki mujhe talKHi

is zahr mein saman-e-baqa mere liye hai

jannat ki hawas ho to main kafir ki pareshan

us shoKH ki KHushbu-e-qaba mere liye hai

pahle bhi kuchh ummid na thi chaaragaron ko

aur ab to dawa hai na dua mere liye hai

mar jaunga mai-KHane se nikla jo kabhi main

nazzara-e-mai ruh-faza mere liye hai

tashKHis-e-tabiban pe hansi aati hai 'hasrat'

ye dard-e-jigar hai ki dawa mere liye hai