neki badi mein paD ke pareshan ho gaya

nekī badī meñ paḌ ke pareshān ho gayā

dil kārobār-e-zīst meñ hairān ho gayā

jaatī bahār le ga.ī sabza daraḳht kā

daur-e-ḳhizāñ meñ TūTnā āsān ho gayā

kaisī 'ajīb bastiyāñ tā'mīr ho ga.iiñ

ye kyā huā ki shahr bayābān ho gayā

ummīd kā khañDar thā jo dil meñ vo Dhah gayā

ye dasht aaj Thiik se vīrān ho gayā

ik zaḳhm kā charāġh thā raushan vo bujh gayā

suunā hamāre dard kā aivān ho gayā

jo ġhalba-e-junūñ meñ kahā darj kar liyā

dīvāna aaj sāhib-e-dīvān ho gayā

neki badi mein paD ke pareshan ho gaya

dil karobar-e-zist mein hairan ho gaya

jati bahaar le gai sabza daraKHt ka

daur-e-KHizan mein TuTna aasan ho gaya

kaisi 'ajib bastiyan ta'mir ho gain

ye kya hua ki shahr bayaban ho gaya

ummid ka khanDar tha jo dil mein wo Dhah gaya

ye dasht aaj Thik se viran ho gaya

ek zaKHm ka charagh tha raushan wo bujh gaya

suna hamare dard ka aiwan ho gaya

jo ghalba-e-junun mein kaha darj kar liya

diwana aaj sahib-e-diwan ho gaya