nigah-e-dost sawal-o-jawab mat karna

nigāh-e-dost savāl-o-javāb mat karnā

maiñ be-hisāb huuñ mujh se hisāb mat karnā

mujhe ḳhudā ne chhupāyā hai laakh pardoñ meñ

jo ho sake to mujhe be-hijāb mat karnā

naqāb-poshī meñ ye dil hai ik dulhan kī tarah

kisī jagah bhī ise be-naqāb mat karnā

maiñ zindagī ke safar kā hasīn aadam huuñ

mujhe sañbhāl ke rakhnā ḳharāb mat karnā

mujhe sukūn milegā to sirf paanī se

so merī pyaas ko vaqf-e-sharāb mat karnā

maiñ ḳhud savāl huuñ apne ḳhamosh hoñToñ par

savāl kar ke mujhe lā-javāb mat karnā

ye zindagī hai mukammal har ek chiiz ke saath

kisī bhī shai kā yahāñ intiḳhāb mat karnā

jo kāmyāb hai vo aarzū se ḳhālī hai

tire nisār mujhe kāmyāb mat karnā

baḌā mazā hai 'kañval' ruuh ko jagāne meñ

tum apnī zaat ko ab mahv-e-ḳhvāb mat karnā

nigah-e-dost sawal-o-jawab mat karna

main be-hisab hun mujh se hisab mat karna

mujhe KHuda ne chhupaya hai lakh pardon mein

jo ho sake to mujhe be-hijab mat karna

naqab-poshi mein ye dil hai ek dulhan ki tarah

kisi jagah bhi ise be-naqab mat karna

main zindagi ke safar ka hasin aadam hun

mujhe sanbhaal ke rakhna KHarab mat karna

mujhe sukun milega to sirf pani se

so meri pyas ko waqf-e-sharab mat karna

main KHud sawal hun apne KHamosh honTon par

sawal kar ke mujhe la-jawab mat karna

ye zindagi hai mukammal har ek chiz ke sath

kisi bhi shai ka yahan intiKHab mat karna

jo kaamyab hai wo aarzu se KHali hai

tere nisar mujhe kaamyab mat karna

baDa maza hai 'kanwal' ruh ko jagane mein

tum apni zat ko ab mahw-e-KHwab mat karna