نگاہ دوست سوال و جواب مت کرنا

نگاہ دوست سوال و جواب مت کرنا

میں بے حساب ہوں مجھ سے حساب مت کرنا

مجھے خدا نے چھپایا ہے لاکھ پردوں میں

جو ہو سکے تو مجھے بے حجاب مت کرنا

نقاب پوشی میں یہ دل ہے اک دلہن کی طرح

کسی جگہ بھی اسے بے نقاب مت کرنا

میں زندگی کے سفر کا حسین آدم ہوں

مجھے سنبھال کے رکھنا خراب مت کرنا

مجھے سکون ملے گا تو صرف پانی سے

سو میری پیاس کو وقف شراب مت کرنا

میں خود سوال ہوں اپنے خموش ہونٹوں پر

سوال کر کے مجھے لاجواب مت کرنا

یہ زندگی ہے مکمل ہر ایک چیز کے ساتھ

کسی بھی شے کا یہاں انتخاب مت کرنا

جو کامیاب ہے وہ آرزو سے خالی ہے

ترے نثار مجھے کامیاب مت کرنا

بڑا مزا ہے کنولؔ روح کو جگانے میں

تم اپنی ذات کو اب محو خواب مت کرنا