nigah-e-shauq se parda haTa gaya koi

nigāh-e-shauq se parda haTā gayā koī

mujhe bhī apnī tarah kā banā gayā koī

utar rahā hai mirī soch ke tarannum meñ

mire ḳhayāl ke andar samā gayā koī

kahāñ pata thā mujhe dasht ke fasāne kā

visāl-o-hijr kī bāteñ sikhā gayā koī

agarche bol rahā thā vo sirf āñkhoñ se

dil-e-ḳharāb kā qissa sunā gayā koī

mujhe ḳhabar hai mirā saath vo nahīñ degā

sitāre paḌhne kā māhir banā gayā koī

sarāb hai yā mirī aarzū mujassam hai

libās-e-ḳhāk meñ dhartī pe aa gayā koī

fareb-e-zāt meñ rahne do sone do mujh ko

yuuñ merī aañkh se parda uThā gayā koī

ye hausle bhī 'atā haiñ rumūz-e-ulfat ke

junūñ meñ dasht ko paanī pilā gayā koī

lagī thī aag yahāñ vasvasoñ kī muddat se

mire bharose kā dāman jalā gayā koī

basā huā hai mirī aañkh meñ salīqe se

mirī nazar ke darīche sajā gayā koī

gulābī rang mire ḳhvāb meñ utar aaya

mujhe gulāb kā paikar banā gayā koī

'adū kī niiñd kī duniyā meñ bhī rasā.ī hai

tumhāre ḳhvāb se aa kar uThā gayā koī

jo baat sunñe ko tarse the kaan 'nīlam' ke

sunānī aap ne thī aur sunā gayā koī

nigah-e-shauq se parda haTa gaya koi

mujhe bhi apni tarah ka bana gaya koi

utar raha hai meri soch ke tarannum mein

mere KHayal ke andar sama gaya koi

kahan pata tha mujhe dasht ke fasane ka

visal-o-hijr ki baaten sikha gaya koi

agarche bol raha tha wo sirf aankhon se

dil-e-KHarab ka qissa suna gaya koi

mujhe KHabar hai mera sath wo nahin dega

sitare paDhne ka mahir bana gaya koi

sarab hai ya meri aarzu mujassam hai

libas-e-KHak mein dharti pe aa gaya koi

fareb-e-zat mein rahne do sone do mujh ko

yun meri aankh se parda uTha gaya koi

ye hausle bhi 'ata hain rumuz-e-ulfat ke

junun mein dasht ko pani pila gaya koi

lagi thi aag yahan waswason ki muddat se

mere bharose ka daman jala gaya koi

basa hua hai meri aankh mein saliqe se

meri nazar ke dariche saja gaya koi

gulabi rang mere KHwab mein utar aaya

mujhe gulab ka paikar bana gaya koi

'adu ki nind ki duniya mein bhi rasai hai

tumhaare KHwab se aa kar uTha gaya koi

jo baat sunne ko tarse the kan 'nilam' ke

sunani aap ne thi aur suna gaya koi