نگاہ یاس سے جو اشک کے گوہر نکلتے ہیں

نگاہ یاس سے جو اشک کے گوہر نکلتے ہیں

وہ خون آرزو سے سرخ رو ہو کر نکلتے ہیں

حریم ناز سے وہ اس طرح باہر نکلتے ہیں

بہ ہر پردہ بہ ہر جلوہ بہ ہر منظر نکلتے ہیں

سکھائے تھے جنہوں نے عشق کو آداب جاں بازی

وہی کافر اشارے زندگی پرور نکلتے ہیں

رسائی گوشۂ داماں تک ان کے کس طرح ہوگی

تصور کی حدوں میں بھی جو شرما کر نکلتے ہیں

مجھے یاران ساحل دامن گرداب میں ڈھونڈھیں

غریق ورطۂ غم کب کنارے پر نکلتے ہیں

جو آگاہ رموز زندگی ہیں بزم ہستی میں

وہ اکثر عیش میں بھی درد کے خوگر نکلتے ہیں

چراغ رہبری ہوتا ہے ہر اک نقش پا جن کا

وہ سالک بے نیاز جادہ و رہبر نکلتے ہیں

وہی ہر ایک جلوہ میں تجلی ریز رہتے ہیں

وہی ہر ایک منظر میں پس منظر نکلتے ہیں

کسی کا نقش پا جب دعوت تسلیم دیتا ہے

تڑپ کر سجدہ ہائے آرزو باہر نکلتے ہیں

انیسؔ احساس درد و فرط مایوسی کو کیا کہئے

کہ اب آنسو بھی میری آنکھ سے کمتر نکلتے ہیں