nigahon se dil mein samane lage ho

nigāhoñ se dil meñ samāne lage ho

mohabbat kā jaadū jagāne lage ho

miTāne lage ho mirā naqsh-e-hastī

javānī ko be-ḳhud banāne lage ho

tasavvur ke ḳhākoñ meñ bharne lage rang

umīdoñ kī bastī basāne lage ho

rag-e-jāñ meñ utre ho naġhmoñ kī lai meñ

mirī ruuh meñ gungunāne lage ho

mujhe le chale ho kaThin vādiyoñ meñ

tamāshā-e-manzil dikhāne lage ho

gumāñ bhī na ho jab mujhe zindagī kā

mire paas us vaqt aane lage ho

mujhe bhī lage pyaar se dekhne tum

mujhe bhī 'nazar' āzmāne lage ho

nigahon se dil mein samane lage ho

mohabbat ka jadu jagane lage ho

miTane lage ho mera naqsh-e-hasti

jawani ko be-KHud banane lage ho

tasawwur ke KHakon mein bharne lage rang

umidon ki basti basane lage ho

rag-e-jaan mein utre ho naghmon ki lai mein

meri ruh mein gungunane lage ho

mujhe le chale ho kaThin wadiyon mein

tamasha-e-manzil dikhane lage ho

guman bhi na ho jab mujhe zindagi ka

mere pas us waqt aane lage ho

mujhe bhi lage pyar se dekhne tum

mujhe bhi 'nazar' aazmane lage ho