nigar-KHana-e-arz-o-sama mila ki nahin

nigār-ḳhāna-e-arz-o-samā milā ki nahīñ

agar milā to koī dilrubā milā ki nahīñ

shikasta-dil ko zarūrat hai khilkhilāne kī

payām-e-gul se tujhe hausla milā ki nahīñ

siyāh niiñd meñ jalte hue charāġhoñ ko

kisī galī meñ koī jāgtā milā ki nahīñ

ruke hue to ruke hī raheñge tā-dam-e-marg

jo chal paḌe the unheñ rāsta milā ki nahīñ

kisī ko phuul khilāte hue mire ghar meñ

koī damaktā huā aa.ina milā ki nahīñ

shaguft-e-ḳhvāb se bhīgī huī in āñkhoñ meñ

koī sitāra mire kaam kā milā ki nahīñ

ġhazal ko sab ke liye aa.ina banāte hue

kisī parī se tirā qāfiya milā ki nahīñ

rukā thā aur kahāñ kārvān-e-rāhat-e-ishq

phir us ke ba.ad vo shīrīñ-adā milā ki nahīñ

savāl karte haiñ aksar mire adū 'sājid'

ki is nagar meñ koī āshnā milā ki nahīñ

nigar-KHana-e-arz-o-sama mila ki nahin

agar mila to koi dilruba mila ki nahin

shikasta-dil ko zarurat hai khilkhilane ki

payam-e-gul se tujhe hausla mila ki nahin

siyah nind mein jalte hue charaghon ko

kisi gali mein koi jagta mila ki nahin

ruke hue to ruke hi rahenge ta-dam-e-marg

jo chal paDe the unhen rasta mila ki nahin

kisi ko phul khilate hue mere ghar mein

koi damakta hua aaina mila ki nahin

shaguft-e-KHwab se bhigi hui in aankhon mein

koi sitara mere kaam ka mila ki nahin

ghazal ko sab ke liye aaina banate hue

kisi pari se tera qafiya mila ki nahin

ruka tha aur kahan karwan-e-rahat-e-ishq

phir us ke baad wo shirin-ada mila ki nahin

sawal karte hain aksar mere adu 'sajid'

ki is nagar mein koi aashna mila ki nahin