نگار خانہ ارض و سما ملا کہ نہیں

نگار خانہ ارض و سما ملا کہ نہیں

اگر ملا تو کوئی دل ربا ملا کہ نہیں

شکستہ دل کو ضرورت ہے کھلکھلانے کی

پیام گل سے تجھے حوصلہ ملا کہ نہیں

سیاہ نیند میں جلتے ہوئے چراغوں کو

کسی گلی میں کوئی جاگتا ملا کہ نہیں

رکے ہوئے تو رکے ہی رہیں گے تا دم مرگ

جو چل پڑے تھے انہیں راستہ ملا کہ نہیں

کسی کو پھول کھلاتے ہوئے مرے گھر میں

کوئی دمکتا ہوا آئنہ ملا کہ نہیں

شگفت‌ خواب سے بھیگی ہوئی ان آنکھوں میں

کوئی ستارہ مرے کام کا ملا کہ نہیں

غزل کو سب کے لئے آئنہ بناتے ہوئے

کسی پری سے ترا قافیہ ملا کہ نہیں

رکا تھا اور کہاں کاروان راحت عشق

پھر اس کے بعد وہ شیریں ادا ملا کہ نہیں

سوال کرتے ہیں اکثر مرے عدو ساجدؔ

کہ اس نگر میں کوئی آشنا ملا کہ نہیں