نگہ کا تیر تم مارو تو دل کا مدعا نکلے

نگہ کا تیر تم مارو تو دل کا مدعا نکلے

تمہارا نام ہو جائے ہمارا حوصلہ نکلے

ستم پر ہو ستم تیرا جفا پر ہو جفا تیری

مگر میری دعا یہ ہے ترے حق میں دعا نکلے

ترے تیر نگاہ پر دل بھی صدقے جان بھی قرباں

ترا انداز میرے حق میں پیغام قضا نکلے

نہ تھی پہلے شناسائی مگر آنکھوں کے ملتے ہی

ہمارے دل کو لے کر آپ تو اب دل ربا نکلے

یہی ارمان دل کا ہے یہی حسرت ہے مدت سے

تمہارے پائے نازک پر مری جاں دم مرا نکلے

بہت ہنستے تھے ہم سنجرؔ کہ تم شیدا بتوں کے ہو

مگر ظاہر میں دیکھا تم کو تو تم با خدا نکلے