nigah ke samne us ka junhi jamal hua

nigah ke sāmne us kā jūñhī jamāl huā

vo dil hī jaane hai us dam jo dil kā haal huā

agar kahūñ maiñ ki chamkā vo barq kī mānind

to kab masal hai ye us kī jo be-misāl huā

qarār o hosh kā jaanā to kis shumār meñ hai

ġharaz phir aap meñ aanā mujhe muhāl huā

idhar se bhar diyā mai ne nigāh kā sāġhar

udhar se zulf kā halqa gale kā jaal huā

bahār-e-husn vo aa.e nazar jo us kī 'nazīr'

to dil vahīñ chaman-e-ishq meñ nihāl huā

nigah ke samne us ka junhi jamal hua

wo dil hi jaane hai us dam jo dil ka haal hua

agar kahun main ki chamka wo barq ki manind

to kab masal hai ye us ki jo be-misal hua

qarar o hosh ka jaana to kis shumar mein hai

gharaz phir aap mein aana mujhe muhaal hua

idhar se bhar diya mai ne nigah ka saghar

udhar se zulf ka halqa gale ka jal hua

bahaar-e-husn wo aae nazar jo us ki 'nazir'

to dil wahin chaman-e-ishq mein nihaal hua