nihan the phul nazar se sharar samne tha

nihāñ the phuul nazar se sharār sāmne thā

bahār thī ki 'azāb-e-bahār sāmne thā

khaḌe the ahl-e-nazar gardaneñ jhukā.e hue

tirā tarāshā huā shāhkār sāmne thā

ḳhizāñ ba-zid thī kaho mausam-e-bahār use

libās-e-ġhuncha-o-gul tār-tār sāmne thā

gharoñ meñ ahl-e-nazar apne baiThte kyūñkar

hayāt-e-nau kā dahaktā chinār sāmne thā

uThā ke sāġhar-e-zahrāb pī ga.e mai-kash

hazār shauq kā anjām-e-kār sāmne thā

havā kuchh aisī chalī gulsitāñ meñ ab ke baras

lahū guloñ ke ba-nām-e-bahār sāmne thā

milā ḳhulūs na jab anjuman se uTh aa.e

ki ahl-e-fikr-o-nazar kā shi'ār sāmne thā

nazar na aatā thā chehra koī bhī saaf 'azīz'

'ajīb vaqt kā gard-o-ġhubār sāmne thā

nihan the phul nazar se sharar samne tha

bahaar thi ki 'azab-e-bahaar samne tha

khaDe the ahl-e-nazar gardanen jhukae hue

tera tarasha hua shahkar samne tha

KHizan ba-zid thi kaho mausam-e-bahaar use

libas-e-ghuncha-o-gul tar-tar samne tha

gharon mein ahl-e-nazar apne baiThte kyunkar

hayat-e-nau ka dahakta chinar samne tha

uTha ke saghar-e-zahrab pi gae mai-kash

hazar shauq ka anjam-e-kar samne tha

hawa kuchh aisi chali gulsitan mein ab ke baras

lahu gulon ke ba-nam-e-bahaar samne tha

mila KHulus na jab anjuman se uTh aae

ki ahl-e-fikr-o-nazar ka shi'ar samne tha

nazar na aata tha chehra koi bhi saf 'aziz'

'ajib waqt ka gard-o-ghubar samne tha