nind ke bojh se palkon ko jhapakti hui aai

niiñd ke bojh se palkoñ ko jhapaktī huī aa.ī

sub.h jab raat kī galiyoñ meñ bhaTaktī huī aa.ī

dīda-e-ḳhushk meñ ik māhī-e-be-āb thī niiñd

chashma-e-ḳhvāb talak aa.ī phaḌaktī huī aa.ī

aur phir kyā huā kuchh yaad nahīñ hai mujh ko

ek bijlī thī ki siine meñ lapaktī huī aa.ī

aaj kyā phir kisī āvāz ne bai.at māñgī

ye mirī ḳhāmushī jo paañv paTaktī huī aa.ī

raat ghabrā ga.ī sūraj se kahā al-madade

vo ba-sad-nāz jo zulfoñ ko jhaTaktī huī aa.ī

ho ga.ī ḳhair tirā naam na aayā lab par

ek aahaT tirī ḳhushbū meñ mahaktī huī aa.ī

vaqt-e-ruḳhsat mirī āñkhoñ kī tarah chup thī jo yaad

ai mire dil tirī mānind dhaḌaktī huī aa.ī

nind ke bojh se palkon ko jhapakti hui aai

subh jab raat ki galiyon mein bhaTakti hui aai

dida-e-KHushk mein ek mahi-e-be-ab thi nind

chashma-e-KHwab talak aai phaDakti hui aai

aur phir kya hua kuchh yaad nahin hai mujh ko

ek bijli thi ki sine mein lapakti hui aai

aaj kya phir kisi aawaz ne baiat mangi

ye meri KHamushi jo panw paTakti hui aai

raat ghabra gai suraj se kaha al-madade

wo ba-sad-naz jo zulfon ko jhaTakti hui aai

ho gai KHair tera nam na aaya lab par

ek aahaT teri KHushbu mein mahakti hui aai

waqt-e-ruKHsat meri aankhon ki tarah chup thi jo yaad

ai mere dil teri manind dhaDakti hui aai