nikal phenkun na usko kahin main sine se

nikāl pheñkūñ na us ko kahīñ maiñ siine se

lahū ubalne lagā hai ik ābgīne se

mazār-e-zīst meñ zer-e-'azāb hai koī

sadā.eñ aatī haiñ shab-bhar kisī dafīne se

rag-e-hayāt hai dast-e-junūn kī zad meñ

mire vujūd ko ḳhatra hai mere jiine se

numū-e-shauq ko lāzim hai zahr-e-nāb koī

hare-bhare haiñ mire zaḳhm ashk piine se

zarā sī der ko mohlat nasīb ho yā-rab

qabā-e-zīst ke chāk-e-mudām siine se

vufūr-e-shauq ko zauq-e-nigāh kaafī hai

harīm-e-yār meñ utro nazar ke ziine se

tamām zaḳhm jo terī 'atā the yār-e-man

libās-e-rūh pe Tāñke ga.e qarīne se

nikal phenkun na us ko kahin main sine se

lahu ubalne laga hai ek aabgine se

mazar-e-zist mein zer-e-'azab hai koi

sadaen aati hain shab-bhar kisi dafine se

rag-e-hayat hai dast-e-junun ki zad mein

mere wujud ko KHatra hai mere jine se

numu-e-shauq ko lazim hai zahr-e-nab koi

hare-bhare hain mere zaKHm ashk pine se

zara si der ko mohlat nasib ho ya-rab

qaba-e-zist ke chaak-e-mudam sine se

wufur-e-shauq ko zauq-e-nigah kafi hai

harim-e-yar mein utro nazar ke zine se

tamam zaKHm jo teri 'ata the yar-e-man

libas-e-ruh pe Tanke gae qarine se