nikalne ko hai dam mera magar hai aarzu baqi

nikalne ko hai dam merā magar hai aarzū baaqī

mileñge ḳhaak meñ lekin rahegī justujū baaqī

maiñ apnā raaz kahne ko bulāyā thā tujhe hamdam

magar afsos maiñ hī rah sakā aur hai na tū baaqī

ye duniyā miTne vaalī hai to phir is par bharosa kyā

fanā ho jā.eñge saare rahegā tū hī tū baaqī

kirāman-kātibīñ jā kar ye izrā.īl se kahnā

Thahar jaao abhī kuchh yaar se hai guftugū baaqī

vuzū zāhid kā āb-e-jū se aur merā hai aañsū se

vuzū bah jā.egā us kā rahe merā vuzū baaqī

tahārat jism kī go ho ga.ī hai ġhusl-e-zāhir se

safā.ī ke liye dil kī abhī hai shust-o-shū baaqī

jalā kar ātish-e-furqat ne dil kī ḳhaak uḌaa.ī hai

nahīñ siine meñ kuchh baaqī magar hai ek hū baaqī

hilālī kar diyā tū ne 'qamar' ko ek chullū meñ

rahe mahshar talak saaqī tirā jām-o-subū baaqī

nikalne ko hai dam mera magar hai aarzu baqi

milenge KHak mein lekin rahegi justuju baqi

main apna raaz kahne ko bulaya tha tujhe hamdam

magar afsos main hi rah saka aur hai na tu baqi

ye duniya miTne wali hai to phir is par bharosa kya

fana ho jaenge sare rahega tu hi tu baqi

kiraman-katibin ja kar ye izrail se kahna

Thahar jao abhi kuchh yar se hai guftugu baqi

wuzu zahid ka aab-e-ju se aur mera hai aansu se

wuzu bah jaega us ka rahe mera wuzu baqi

tahaarat jism ki go ho gai hai ghusl-e-zahir se

safai ke liye dil ki abhi hai shust-o-shu baqi

jala kar aatish-e-furqat ne dil ki KHak uDai hai

nahin sine mein kuchh baqi magar hai ek hu baqi

hilali kar diya tu ne 'qamar' ko ek chullu mein

rahe mahshar talak saqi tera jam-o-subu baqi