nikhat gulon mein KHub hai farhat nahin rahi

nik.hat guloñ meñ ḳhuub hai farhat nahīñ rahī

ḳhushiyoñ ko kyā huā ki masarrat nahīñ rahī

ye kah ke chheḌtā hai mirā dil dimāġh ko

sunte haiñ tujh ko us se mohabbat nahīñ rahī

ye faqr hai ki dard kī daulat ga.ī hai aur

ye dard bhī nahīñ ki vo daulat nahīñ rahī

sach to ye hai ki mujh ko hī marne kā shauq thā

hālat mirī ye us kī badaulat nahīñ rahī

chhoḌe ga.e haiñ qaid se āzād kab hue

itnā hī bas huā ki hirāsat nahīñ rahī

paḌhtā rahā vo mujh ko mirā kar ke tarjuma

kyā jāntā ki asl 'ibārat nahīñ rahī

ik 'arsa-e-sharār thā hastī kā ye safar

aisī to kuchh tavīl masāfat nahīñ rahī

nikhat gulon mein KHub hai farhat nahin rahi

KHushiyon ko kya hua ki masarrat nahin rahi

ye kah ke chheDta hai mera dil dimagh ko

sunte hain tujh ko us se mohabbat nahin rahi

ye faqr hai ki dard ki daulat gai hai aur

ye dard bhi nahin ki wo daulat nahin rahi

sach to ye hai ki mujh ko hi marne ka shauq tha

haalat meri ye us ki badaulat nahin rahi

chhoDe gae hain qaid se aazad kab hue

itna hi bas hua ki hirasat nahin rahi

paDhta raha wo mujh ko mera kar ke tarjuma

kya jaanta ki asl 'ibarat nahin rahi

ek 'arsa-e-sharar tha hasti ka ye safar

aisi to kuchh tawil masafat nahin rahi