نشان صبح گہ جاوداں کوئی نہیں ہے

نشان صبح گہ جاوداں کوئی نہیں ہے

چراغ‌‌ دیدۂ شب زادگاں کوئی نہیں ہے

خراب حسرت عمر مسیح عالم ہوں

خوشا مداوائے زخم گماں کوئی نہیں ہے

سراپا زخم‌‌ خدنگ نگاہ فردا ہوں

مقام دل سر موجودگاں کوئی نہیں ہے

نہ باندھ مصرع تمہید کلفت ہستی

یہاں پہ کوہ تمنا بجاں کوئی نہیں ہے

غبار جادۂ تنہا، دیار سرگرداں

کہ بے رہائش و بے خانماں کوئی نہیں ہے

پس وفائے تغافل صفت، بزعم وفا

بجز یقین قریب گماں کوئی نہیں ہے

تو پھر یہ پردۂ تخلیق چشم حیرت ہے

اگر بفرض گراں آسماں کوئی نہیں ہے

چراغ مطلع امید گاہ روشن ہے

اگرچہ جلوہ‌ فگن تا کراں کوئی نہیں ہے

مقام فکر و عمل ہے کہ بے نیازئ شوق

کہ دل میں خدشۂ سود و زیاں کوئی نہیں ہے

بہ طمع دارئ گنج معانیان عجب

شمار حسرت گنج رواں کوئی نہیں ہے

تماشہ بین تماشائے خود فریبی ہیں

نوائے‌‌ نغمہ و نعرہ زناں کوئی نہیں ہے

خمار بادۂ کہنہ نواز کم نظری

فراغ صحبت فہمیدگاں کوئی نہیں ہے

ستم رسیدۂ شب ہائے انتظار سحر

فغاں کہ منتظر نیم جاں کوئی نہیں ہے

فسردگی کو گزر گاہ نو بہاری سے

علاقۂ‌ ہوس بوستاں کوئی نہیں ہے

کہاں صفات بیان علی کہاں حادثؔ

مگر بہ حسب سخن قدرداں کوئی نہیں ہے