nujum-o-mah se uncha pahunch gaya hun main

nujūm-o-māh se ūñchā pahuñch gayā huuñ maiñ

karishma-sāzī-e-qudrat kī intihā huuñ maiñ

talāsh kar ke tujhe ḳhud ko DhūñDhtā huuñ maiñ

baḌā ġhazab hai ki manzil pe kho gayā huuñ maiñ

hisār-e-zāt ko toḌā to raaz mujh pe khulā

vo mujh se achchhā hai jis ko bhī dekhtā huuñ maiñ

maiñ laakh garm-e-safar huuñ mujhe hai ye bhī ḳhabar

ki kyā huuñ kaun huuñ kis samt jā rahā huuñ maiñ

hue haiñ is liye mānūs mujh se ahl-e-chaman

chaman meñ rahne ke ādāb jāntā huuñ maiñ

mujhe yaqīn hai manzil pe jā ke dam lūñgā

kisī ke naqsh-e-qadam chūmtā chalā huuñ maiñ

kisī ke jalvoñ kā ā.īna ban gayā 'rā'nā'

ki apne dil se kudūrat miTā chukā huuñ maiñ

nujum-o-mah se uncha pahunch gaya hun main

karishma-sazi-e-qudrat ki intiha hun main

talash kar ke tujhe KHud ko DhunDhta hun main

baDa ghazab hai ki manzil pe kho gaya hun main

hisar-e-zat ko toDa to raaz mujh pe khula

wo mujh se achchha hai jis ko bhi dekhta hun main

main lakh garm-e-safar hun mujhe hai ye bhi KHabar

ki kya hun kaun hun kis samt ja raha hun main

hue hain is liye manus mujh se ahl-e-chaman

chaman mein rahne ke aadab jaanta hun main

mujhe yaqin hai manzil pe ja ke dam lunga

kisi ke naqsh-e-qadam chumta chala hun main

kisi ke jalwon ka aaina ban gaya 'ra'na'

ki apne dil se kudurat miTa chuka hun main