نجوم و ماہ سے اونچا پہنچ گیا ہوں میں

نجوم و ماہ سے اونچا پہنچ گیا ہوں میں

کرشمہ سازیٔ قدرت کی انتہا ہوں میں

تلاش کر کے تجھے خود کو ڈھونڈھتا ہوں میں

بڑا غضب ہے کہ منزل پہ کھو گیا ہوں میں

حصار ذات کو توڑا تو راز مجھ پہ کھلا

وہ مجھ سے اچھا ہے جس کو بھی دیکھتا ہوں میں

میں لاکھ گرم سفر ہوں مجھے ہے یہ بھی خبر

کہ کیا ہوں کون ہوں کس سمت جا رہا ہوں میں

ہوئے ہیں اس لیے مانوس مجھ سے اہل چمن

چمن میں رہنے کے آداب جانتا ہوں میں

مجھے یقین ہے منزل پہ جا کے دم لوں گا

کسی کے نقش قدم چومتا چلا ہوں میں

کسی کے جلوؤں کا آئینہ بن گیا رعناؔ

کہ اپنے دل سے کدورت مٹا چکا ہوں میں