numayan hain meri barbaadiyon ke kuchh nishan ab tak

numāyāñ haiñ mirī barbādiyoñ ke kuchh nishāñ ab tak

paḌī hai sahn-e-gulshan meñ ye ḳhāk-e-āshiyāñ ab tak

ma.āz-allāh ye mujh bekas pe zor-e-āsmāñ ab tak

nasheman kyā milā girtī haiñ dil par bijliyāñ ab tak

diyā thā dard tum ne vo bhī nā-kāfī huā mujh ko

rahī hai dard-o-ġham kī nā-mukammal dāstāñ ab tak

mohabbat ḳhatm hone par bhī baaqī haiñ nishāñ ab tak

mire siine meñ hai ābād ye dard-e-nihāñ ab tak

chaman ko chhoḌ kar jā.ūñ kahāñ maiñ ai chaman vaalo

vahī dushman huā merā rahā jo meherbāñ ab tak

dam-e-āḳhir na aa.e vo ayādat ke liye merī

ta.ajjub hai dil-e-muztar ki haiñ vo bad-gumāñ ab tak

tujhe nīchā dikhātā maiñ kabhī kā nāla-e-dil se

sitam sahtā rahā lekin tire ai āsmāñ ab tak

tirā nām-e-mubārak hai zabāñ par marne vaale kī

tujhe bhūlā nahīñ hai be-ḳhudī meñ meherbāñ ab tak

kisī ke husn kī hotī hai muddat se kasak dil meñ

magar samjhe nahīñ ai 'rāz' ye rāz-e-nihāñ ab tak

numayan hain meri barbaadiyon ke kuchh nishan ab tak

paDi hai sahn-e-gulshan mein ye KHak-e-ashiyan ab tak

maaz-allah ye mujh bekas pe zor-e-asman ab tak

nasheman kya mila girti hain dil par bijliyan ab tak

diya tha dard tum ne wo bhi na-kafi hua mujh ko

rahi hai dard-o-gham ki na-mukammal dastan ab tak

mohabbat KHatm hone par bhi baqi hain nishan ab tak

mere sine mein hai aabaad ye dard-e-nihan ab tak

chaman ko chhoD kar jaun kahan main ai chaman walo

wahi dushman hua mera raha jo meherban ab tak

dam-e-aKHir na aae wo ayaadat ke liye meri

tajjub hai dil-e-muztar ki hain wo bad-guman ab tak

tujhe nicha dikhata main kabhi ka nala-e-dil se

sitam sahta raha lekin tere ai aasman ab tak

tera nam-e-mubarak hai zaban par marne wale ki

tujhe bhula nahin hai be-KHudi mein meherban ab tak

kisi ke husn ki hoti hai muddat se kasak dil mein

magar samjhe nahin ai 'raaz' ye raaz-e-nihan ab tak