numud o bud ko aaqil habab samjhe hain

numūd o buud ko aaqil habāb samjhe haiñ

vo jāgte haiñ jo duniyā ko ḳhvāb samjhe haiñ

kabhī burā nahīñ jaanā kisī ko apne sivā

har ek zarre ko ham āftāb samjhe haiñ

ajab nahīñ hai jo shīshoñ meñ bhar ke le jaa.eñ

in āñsuoñ ko farishte gulāb samjhe haiñ

zamāna ek tarah par kabhī nahīñ rahtā

isī ko ahl-e-jahāñ inqilāb samjhe haiñ

unhīñ ko dār-e-baqā kī hai puḳhtagī kā ḳhayāl

jo be-sabāti-e-dahr-e-ḳharāb samjhe haiñ

shabāb kho ke bhī ġhaflat vahī hai pīroñ ko

sahar kī niind ko bhī shab kā ḳhvāb samjhe haiñ

lahad meñ aa.eñ nakīrain aa.eñ bismillāh

har ik savāl kā ham bhī javāb samjhe haiñ

agar ġhurūr hai aadā ko apnī kasrat par

to is hayāt ko ham bhī habāb samjhe haiñ

na kuchh ḳhabar hai hadīsoñ kī in safīhoñ ko

na ye ma.āni-e-ummul-kitāb samjhe haiñ

kabhī shaqī mutamatta na hoñge duniyā se

jise ye aab use ham sarāb samjhe haiñ

muzīl-e-aql hai duniyā kī daulat ai mun.im

usī ke nashshe ko suufī sharāb samjhe haiñ

harārateñ haiñ ma.āl-e-halāvat-e-duniyā

vo zahr hai jise ham shahd-e-nāb samjhe haiñ

'anīs' maḳhmal o diibā se kyā faqīroñ ko

isī zamīn ko ham farsh-e-ḳhvāb samjhe haiñ

numud o bud ko aaqil habab samjhe hain

wo jagte hain jo duniya ko KHwab samjhe hain

kabhi bura nahin jaana kisi ko apne siwa

har ek zarre ko hum aaftab samjhe hain

ajab nahin hai jo shishon mein bhar ke le jaen

in aansuon ko farishte gulab samjhe hain

zamana ek tarah par kabhi nahin rahta

isi ko ahl-e-jahan inqilab samjhe hain

unhin ko dar-e-baqa ki hai puKHtagi ka KHayal

jo be-sabaati-e-dahr-e-KHarab samjhe hain

shabab kho ke bhi ghaflat wahi hai piron ko

sahar ki nind ko bhi shab ka KHwab samjhe hain

lahad mein aaen nakirain aaen bismillah

har ek sawal ka hum bhi jawab samjhe hain

agar ghurur hai aada ko apni kasrat par

to is hayat ko hum bhi habab samjhe hain

na kuchh KHabar hai hadison ki in safihon ko

na ye maani-e-ummul-kitab samjhe hain

kabhi shaqi mutamatta na honge duniya se

jise ye aab use hum sarab samjhe hain

muzil-e-aql hai duniya ki daulat ai munim

usi ke nashshe ko sufi sharab samjhe hain

hararaten hain maal-e-halawat-e-duniya

wo zahr hai jise hum shahd-e-nab samjhe hain

'anis' maKHmal o diba se kya faqiron ko

isi zamin ko hum farsh-e-KHwab samjhe hain