پا برہنہ لا تعلق بے اماں ہے زندگی

پا برہنہ لا تعلق بے اماں ہے زندگی

در بدر اس شہر میں گریہ کناں ہے زندگی

ہم بھی تیرے چاہنے والوں میں ہوتے ہیں شمار

ہم سے بدبختوں پہ کیوں نا مہرباں ہے زندگی

اے شب فرقت ترا ہر فیصلہ منظور ہے

آج تیرے اور میرے درمیاں ہے زندگی

جس میں کوئی جاذبیت ہے نہ کوئی درد ہے

ہم سے ناداروں کی ایسی داستاں ہے زندگی

تشنگی جس کا مقدر گمرہی جس کا مزاج

کربلا کے شہر میں وہ کارواں ہے زندگی

اس حقیقت کے سبھی ہیں معترف راہیؔ میاں

آپ سے وابستہ ہو تو آسماں ہے زندگی