pai hai wo milkiyat jis mein mila kuchh bhi nahin

paa.ī hai vo milkiyat jis meñ milā kuchh bhī nahīñ

sar pe saarā āsmāñ aur zer-e-pā kuchh bhī nahīñ

asl apnā khojtā phirtā hai aadam umr bhar

zindagī ḳhud ke ta.āqub ke sivā kuchh bhī nahīñ

ab palaT kar pūchhte ho raah meñ kyā kyā huā

ham siyah-baḳhtoñ ko kyā hogā bhalā kuchh bhī nahīñ

āshiqī par qaul karte aa rahe haiñ chand log

log vo jin ke liye mehr-o-vafā kuchh bhī nahīñ

roz kitne hī sitāre TimTimā kar bujh ga.e

yuuñ qazā kā ġham na kar ye sāneha kuchh bhī nahīñ

hāsil-e-ulfat jo pūchho to haiñ mere do javāb

ek to saarī ḳhudā.ī dūsrā kuchh bhī nahīñ

phir havā kā ruḳh palaTne ko hai un kī ḳhair ho

jin charāġhoñ se hamārā rābta kuchh bhī nahīñ

kis qadar dushvār thā gaḌhnā koī duniyā jidhar

ibtidā kuchh bhī nahīñ aur intihā kuchh bhī nahīñ

ek sāhab 'mīr' janme tis pe ik ġhālib hue

phir ġhazal-goī meñ karne ko nayā kuchh bhī nahīñ

pai hai wo milkiyat jis mein mila kuchh bhi nahin

sar pe sara aasman aur zer-e-pa kuchh bhi nahin

asl apna khojta phirta hai aadam umr bhar

zindagi KHud ke taaqub ke siwa kuchh bhi nahin

ab palaT kar puchhte ho rah mein kya kya hua

hum siyah-baKHton ko kya hoga bhala kuchh bhi nahin

aashiqi par qaul karte aa rahe hain chand log

log wo jin ke liye mehr-o-wafa kuchh bhi nahin

roz kitne hi sitare TimTima kar bujh gae

yun qaza ka gham na kar ye saneha kuchh bhi nahin

hasil-e-ulfat jo puchho to hain mere do jawab

ek to sari KHudai dusra kuchh bhi nahin

phir hawa ka ruKH palaTne ko hai un ki KHair ho

jin charaghon se hamara rabta kuchh bhi nahin

kis qadar dushwar tha gaDhna koi duniya jidhar

ibtida kuchh bhi nahin aur intiha kuchh bhi nahin

ek sahab 'mir' janme tis pe ek ghaalib hue

phir ghazal-goi mein karne ko naya kuchh bhi nahin