paDa hai hijr to aise hi ji lubhate hain

paḌā hai hijr to aise hī jī lubhāte haiñ

ab us ke jaadū badan ke tarāne gaate haiñ

hameñ manā bhī liyā kar ki maan rah jaa.e

ham aise log muravvat meñ ruuTh jaate haiñ

namī to ḳhaak kī tah meñ qiyām kartī hai

ham aise haiñ nahīñ jaisā tumheñ dikhāte haiñ

tum itnī der meñ majbūriyāñ banā lo ki ham

ga.e dinoñ kī rifāqat uThā ke laate haiñ

ham us ke zehn pe ik 'arsa tak savār rahe

so baqiyā 'umr yahī ik ḳhushī manāte haiñ

javān hote hī jis ne bikharnā hotā hai

ham aise ḳhvāb ko apnā lahū pilāte haiñ

paDa hai hijr to aise hi ji lubhate hain

ab us ke jadu badan ke tarane gate hain

hamein mana bhi liya kar ki man rah jae

hum aise log murawwat mein ruTh jate hain

nami to KHak ki tah mein qiyam karti hai

hum aise hain nahin jaisa tumhein dikhate hain

tum itni der mein majburiyan bana lo ki hum

gae dinon ki rifaqat uTha ke late hain

hum us ke zehn pe ek 'arsa tak sawar rahe

so baqiya 'umr yahi ek KHushi manate hain

jawan hote hi jis ne bikharna hota hai

hum aise KHwab ko apna lahu pilate hain