پڑا ہے ہجر تو ایسے ہی جی لبھاتے ہیں

پڑا ہے ہجر تو ایسے ہی جی لبھاتے ہیں

اب اس کے جادو بدن کے ترانے گاتے ہیں

ہمیں منا بھی لیا کر کہ مان رہ جائے

ہم ایسے لوگ مروت میں روٹھ جاتے ہیں

نمی تو خاک کی تہہ میں قیام کرتی ہے

ہم ایسے ہیں نہیں جیسا تمہیں دکھاتے ہیں

تم اتنی دیر میں مجبوریاں بنا لو کہ ہم

گئے دنوں کی رفاقت اٹھا کے لاتے ہیں

ہم اس کے ذہن پہ اک عرصہ تک سوار رہے

سو بقیہ عمر یہی اک خوشی مناتے ہیں

جوان ہوتے ہی جس نے بکھرنا ہوتا ہے

ہم ایسے خواب کو اپنا لہو پلاتے ہیں