pahle bachpan le gaya phir naujawani le gaya

pahle bachpan le gayā phir naujavānī le gayā

vaqt apne saath sab yādeñ suhānī le gayā

jaane vaalā ghar se saarī shādmānī le gayā

titliyoñ ke rang phūloñ kī javānī le gayā

log us kī baat pe kaise na karte e'tibār

jab gayā bāzār meñ taaza kahānī le gayā

kitne rishtoñ kā taqaddus kitne jazboñ kā ḳhulūs

ye nayā culture ka.ī chīzeñ purānī le gayā

vo mirī tāqat to kyā bantā ḳhizāñ ke daur meñ

haañ mire kamzor lamhoñ kī kahānī le gayā

rāt-bhar vo mere jazboñ ko zabāñ detā rahā

sub.h ko 'arshad' mirī sho'la-bayānī le gayā

pahle bachpan le gaya phir naujawani le gaya

waqt apne sath sab yaaden suhani le gaya

jaane wala ghar se sari shadmani le gaya

titliyon ke rang phulon ki jawani le gaya

log us ki baat pe kaise na karte e'tibar

jab gaya bazar mein taza kahani le gaya

kitne rishton ka taqaddus kitne jazbon ka KHulus

ye naya culture kai chizen purani le gaya

wo meri taqat to kya banta KHizan ke daur mein

han mere kamzor lamhon ki kahani le gaya

raat-bhar wo mere jazbon ko zaban deta raha

subh ko 'arshad' meri sho'la-bayani le gaya