پہلے بچپن لے گیا پھر نوجوانی لے گیا

پہلے بچپن لے گیا پھر نوجوانی لے گیا

وقت اپنے ساتھ سب یادیں سہانی لے گیا

جانے والا گھر سے ساری شادمانی لے گیا

تتلیوں کے رنگ پھولوں کی جوانی لے گیا

لوگ اس کی بات پہ کیسے نہ کرتے اعتبار

جب گیا بازار میں تازہ کہانی لے گیا

کتنے رشتوں کا تقدس کتنے جذبوں کا خلوص

یہ نیا کلچر کئی چیزیں پرانی لے گیا

وہ مری طاقت تو کیا بنتا خزاں کے دور میں

ہاں مرے کمزور لمحوں کی کہانی لے گیا

رات بھر وہ میرے جذبوں کو زباں دیتا رہا

صبح کو ارشدؔ مری شعلہ بیانی لے گیا