pahle mujhse kaman li gai thi

pahle mujh se kamān lī ga.ī thī

phir vahī mujh pe taan lī ga.ī thī

ghar bachānā nahīñ chalānā thā

bech kar ghar dukān lī ga.ī thī

ye añgūThī tumhārī uñglī kī

chhoḌ kar do-jahān lī ga.ī thī

be-amāñ kar ke rakh diyā us ne

jis kī ḳhātir amaan lī ga.ī thī

ham ne rakkhā tirā bhram varna

terī nīyat to jaan lī ga.ī thī

pusht-e-ādam meñ baa'd meñ rakkhā

pahle mujh se zabān lī ga.ī thī

dukh kī shiddat se hans paḌā thā 'alī'

jab zamāne kī maan lī ga.ī thī

pahle mujh se kaman li gai thi

phir wahi mujh pe tan li gai thi

ghar bachana nahin chalana tha

bech kar ghar dukan li gai thi

ye anguThi tumhaari ungli ki

chhoD kar do-jahan li gai thi

be-aman kar ke rakh diya us ne

jis ki KHatir aman li gai thi

hum ne rakkha tera bhram warna

teri niyat to jaan li gai thi

pusht-e-adam mein ba'd mein rakkha

pahle mujh se zaban li gai thi

dukh ki shiddat se hans paDa tha 'ali'

jab zamane ki man li gai thi