pahle mujhe nisab se ghafil kiya gaya

pahle mujhe nisāb se ġhāfil kiyā gayā

phir imtihāñ ke vāste qaa.il kiyā gayā

saarī sipāh dūsrī jānib chalī ga.ī

mujh ko jo mere madd-e-muqābil kiyā gayā

phir ḳhvāhishoñ ko dil kī sifārish pe ek din

ḳhvāboñ kī ḳhānqāh meñ dāḳhil kiyā gayā

kuchh kashtiyoñ ne mil ke jazīre banā liye

dariyā jo sāhiloñ ke mumāsil kiyā gayā

ā.inda marhaboñ se ulajhnā nahīñ kabhī

ḳhaibar se kyā sabaq yahī hāsil kiyā gayā

shauq-e-safar ke izn-e-junūñ se milāp par

kitne hī rāstoñ ko manāzil kiyā gayā

tafsīr matn-e-ḳhauf kī likkhī na jā sakī

vahshat bharā sahīfa jo nāzil kiyā gayā

reg-e-talab ko sat.h-e-qanā.at pe Daal kar

dariyā-e-mumkināt kā sāhil kiyā gayā

lafzoñ kī shakl ḳhuun bahegā tamām umr

maiñ tez dhaar vaqt se ghāyal kiyā gayā

pahle mujhe nisab se ghafil kiya gaya

phir imtihan ke waste qail kiya gaya

sari sipah dusri jaanib chali gai

mujh ko jo mere madd-e-muqabil kiya gaya

phir KHwahishon ko dil ki sifarish pe ek din

KHwabon ki KHanqah mein daKHil kiya gaya

kuchh kashtiyon ne mil ke jazire bana liye

dariya jo sahilon ke mumasil kiya gaya

aainda marhabon se ulajhna nahin kabhi

KHaibar se kya sabaq yahi hasil kiya gaya

shauq-e-safar ke izn-e-junun se milap par

kitne hi raston ko manazil kiya gaya

tafsir matn-e-KHauf ki likkhi na ja saki

wahshat bhara sahifa jo nazil kiya gaya

reg-e-talab ko sath-e-qanaat pe Dal kar

dariya-e-mumkinat ka sahil kiya gaya

lafzon ki shakl KHun bahega tamam umr

main tez dhaar waqt se ghayal kiya gaya