pahle pahle bulaya gaya Dakiya

pahle pahle bulāyā gayā Dākiyā

phir ka.ī baar aaya gayā Dākiyā

kachche rastoñ se niklā to ḳhat gir paḌe

ek patthar se Takrā gayā Dākiyā

log dīvār-o-dar se lipaTne lage

ek din gaañv meñ aa gayā Dākiyā

kachche ghar kī pahuñch se bahut duur thā

bād-o-bārāñ se ghabrā gayā Dākiyā

dil pe dastak sunā.ī na dī phir kabhī

aañkh se duur hotā gayā Dākiyā

haath maltī rahī ḳhvāhish-e-ḳhvāñdagī

jo batāyā vo likhtā gayā Dākiyā

āḳhirī ḳhat liye āḳhirī moḌ par

āḳhirī baar dekhā gayā Dākiyā

pahle pahle bulaya gaya Dakiya

phir kai bar aaya gaya Dakiya

kachche raston se nikla to KHat gir paDe

ek patthar se Takra gaya Dakiya

log diwar-o-dar se lipaTne lage

ek din ganw mein aa gaya Dakiya

kachche ghar ki pahunch se bahut dur tha

baad-o-baran se ghabra gaya Dakiya

dil pe dastak sunai na di phir kabhi

aankh se dur hota gaya Dakiya

hath malti rahi KHwahish-e-KHwandagi

jo bataya wo likhta gaya Dakiya

aaKHiri KHat liye aaKHiri moD par

aaKHiri bar dekha gaya Dakiya