pai-ba-pai qasid wahan aate rahe jate rahe

pai-ba-pai qāsid vahāñ aate rahe jaate rahe

'umr bhar ham yuuñ hī apne dil ko bahlāte rahe

pūchhte haiñ vo tire jī meñ hai kyā kuchh to batā

kyā batā.eñ ham to apne jī se hī jaate rahe

kyā ḳhabar thī bazm meñ vo shoḳh bhī aa jā.egā

muddatoñ apnī ġhazal ham paḌh ke pachhtāte rahe

sāmne āñkhoñ ke apnā gulsitāñ luTtā rahā

aur ham bechārgī kā apnī ġham khāte rahe

āñkheñ hī malte rahe ham aa.ī jab fasl-e-bahār

phuul is gulshan ke ik ik kar ke murjhāte rahe

imtihāñ rāh-e-talab kā kis qadar jāñ-soz thā

rahnumā milte rahe aur ham ko bhaTkāte rahe

bātoñ bātoñ meñ hañsāyā maiñ ne un ko bārhā

vo magar mujh ko hamesha ḳhuun rulvāte rahe

mudda'ā ye thā ki hai shādāb kisht-e-ārzū

apnī āñkhoñ se hamesha ashk barsāte rahe

aisī qismat thī kahāñ 'vāsif' ki vo dete javāb

phir bhī ham un ko salām-e-shauq kahvāte rahe

pai-ba-pai qasid wahan aate rahe jate rahe

'umr bhar hum yun hi apne dil ko bahlate rahe

puchhte hain wo tere ji mein hai kya kuchh to bata

kya bataen hum to apne ji se hi jate rahe

kya KHabar thi bazm mein wo shoKH bhi aa jaega

muddaton apni ghazal hum paDh ke pachhtate rahe

samne aankhon ke apna gulsitan luTta raha

aur hum bechaargi ka apni gham khate rahe

aankhen hi malte rahe hum aai jab fasl-e-bahaar

phul is gulshan ke ek ek kar ke murjhate rahe

imtihan rah-e-talab ka kis qadar jaan-soz tha

rahnuma milte rahe aur hum ko bhaTkate rahe

baaton baaton mein hansaya main ne un ko barha

wo magar mujh ko hamesha KHun rulwate rahe

mudda'a ye tha ki hai shadab kisht-e-arzu

apni aankhon se hamesha ashk barsate rahe

aisi qismat thi kahan 'wasif' ki wo dete jawab

phir bhi hum un ko salam-e-shauq kahwate rahe