palkon ki dahliz pe chamka ek sitara tha

palkoñ kī dahlīz pe chamkā ek sitārā thā

sāhil kī is bhiiḌ meñ jaane kaun hamārā thā

kohsāroñ kī guuñj kī sūrat phail gayā hai vo

maiñ ne apne-āp meñ chhup kar jise pukārā thā

sar se guzartī har ik mauj ko aise dekhte haiñ

jaise is girdāb-e-fanā meñ yahī sahārā thā

hijr kī shab vo niilī āñkheñ aur bhī niilī thiiñ

jaise us ne apne sar se bojh utārā thā

jis kī jhilmiltā meñ tum ne mujh ko qatl kiyā

patjhaḌ kī us raat vo sab se raushan taarā thā

tark-e-vafā ke ba.ad milā to jab ma.alūm huā

is meñ kitne rañg the us ke kaun hamārā thā

kaun kahāñ par jhūTā niklā kyā batlāte ham

duniyā kī tafrīh thī is meñ hameñ ḳhasārā thā

jo manzil bhī raah meñ aa.ī dil kā bojh banī

vo us kī ta.abīr na thī jo ḳhvāb hamārā thā

ye kaisī āvāz hai jis kī zinda guuñj huuñ maiñ

sub.h-e-azal meñ kis ne 'amjad' mujhe pukārā thā

palkon ki dahliz pe chamka ek sitara tha

sahil ki is bhiD mein jaane kaun hamara tha

kohsaron ki gunj ki surat phail gaya hai wo

main ne apne-ap mein chhup kar jise pukara tha

sar se guzarti har ek mauj ko aise dekhte hain

jaise is girdab-e-fana mein yahi sahaara tha

hijr ki shab wo nili aankhen aur bhi nili thin

jaise us ne apne sar se bojh utara tha

jis ki jhilmilta mein tum ne mujh ko qatl kiya

patjhaD ki us raat wo sab se raushan tara tha

tark-e-wafa ke baad mila to jab malum hua

is mein kitne rang the us ke kaun hamara tha

kaun kahan par jhuTa nikla kya batlate hum

duniya ki tafrih thi is mein hamein KHasara tha

jo manzil bhi rah mein aai dil ka bojh bani

wo us ki tabir na thi jo KHwab hamara tha

ye kaisi aawaz hai jis ki zinda gunj hun main

subh-e-azal mein kis ne 'amjad' mujhe pukara tha