palkon pe ashk-e-gham se charaghan kiye hue

palkoñ pe ashk-e-ġham se charāġhāñ kiye hue

ham haiñ tumhārī diid kā sāmāñ kiye hue

bazm-e-jahāñ ko haiñ vo daraḳhshāñ kiye hue

har rang-o-bū meñ ḳhud ko numāyāñ kiye hue

ham kyā Dareñge gardish-e-lail-o-nahār se

ham haiñ tavāf-e-kūcha-e-jānāñ kiye hue

ik din nasīb hogī mujhe manzil-e-hayāt

zauq-e-talab hai raah ko āsāñ kiye hue

duniyā pe ab nigāh jame bhī to kyā jame

husn-o-jamāl-e-dost hai hairāñ kiye hue

manzūr qaid-e-ġham se rihā.ī nahīñ hameñ

ham ḳhud haiñ apne qalb ko zindāñ kiye hue

us ne bhī apne chehre se parda uThā diyā

dekhā hameñ jo chaak garebāñ kiye hue

duniyā kī zulmatoñ ko maiñ baḳhshūñgā raushnī

dil meñ huuñ sham’-e-‘ishq farozāñ kiye hue

dil mutma.in hai aap kī nisbat ke faiz se

hālāt-e-zindagī haiñ pareshāñ kiye hue

'sādiq' hamārī zaat hai ā.īna-e-vafā

ham haiñ jahān-e-'ishq kā sāmāñ kiye hue

palkon pe ashk-e-gham se charaghan kiye hue

hum hain tumhaari did ka saman kiye hue

bazm-e-jahan ko hain wo daraKHshan kiye hue

har rang-o-bu mein KHud ko numayan kiye hue

hum kya Darenge gardish-e-lail-o-nahaar se

hum hain tawaf-e-kucha-e-jaanan kiye hue

ek din nasib hogi mujhe manzil-e-hayat

zauq-e-talab hai rah ko aasan kiye hue

duniya pe ab nigah jame bhi to kya jame

husn-o-jamal-e-dost hai hairan kiye hue

manzur qaid-e-gham se rihai nahin hamein

hum KHud hain apne qalb ko zindan kiye hue

us ne bhi apne chehre se parda uTha diya

dekha hamein jo chaak gareban kiye hue

duniya ki zulmaton ko main baKHshunga raushni

dil mein hun sham’-e-‘ishq farozan kiye hue

dil mutmain hai aap ki nisbat ke faiz se

haalat-e-zindagi hain pareshan kiye hue

'sadiq' hamari zat hai aaina-e-wafa

hum hain jahan-e-'ishq ka saman kiye hue